पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
काठमाडौं । प्रतिनिधिसभाको आज बस्ने बैठकमा आर्थिक वर्ष २०८३/०८४ को राजस्व र व्ययको वार्षिक अनुमान (बजेट) माथि सामान्य छलफल सुरु हुने भएको छ।
संघीय संसद् सचिवालयका अनुसार दिउँसो १ बजे बस्ने बैठकको प्रारम्भमा सभामुखले राष्ट्रपतिको कार्यालयबाट प्राप्त विधेयक प्रमाणीकरणसम्बन्धी पत्रको व्यहोरा पढेर सुनाउने कार्यसूची रहेको छ।
त्यसपछि अर्थमन्त्री डा. स्वर्णिम वाग्लेले आर्थिक वर्ष २०८३/०८४ को राजस्व र व्ययको वार्षिक अनुमानमाथि सामान्य छलफल प्रारम्भ गरियोस् भन्ने प्रस्ताव वक्तव्यसहित प्रस्तुत गर्नेछन्।
अर्थमन्त्रीको प्रस्ताव पेश भएसँगै प्रतिनिधिसभामा आगामी आर्थिक वर्षको बजेटमाथि सामान्य छलफल सुरु हुनेछ। छलफलका क्रममा सांसदहरूले बजेटका प्राथमिकता, कार्यक्रम तथा स्रोत व्यवस्थापनलगायत विषयमा आफ्नो धारणा राख्नेछन्।
सरकारले गत जेठ १५ गते संघीय संसद्को संयुक्त बैठकमा आगामी आर्थिक वर्षका लागि बजेट प्रस्तुत गरेको थियो। बजेटमाथिको सामान्य छलफलपछि मन्त्रालयगत शीर्षकहरूमाथि विस्तृत छलफल हुने संसदीय कार्यतालिका रहेको छ।
