ब्रड पिकमा इतिहास रच्ने अभियान संकटमा, निर्मल ‘निम्स’ पुर्जासहित १० आरोही सम्पर्कविहीन

काठमाडौं । विश्व पर्वतारोहणमा नयाँ इतिहास रच्ने लक्ष्यसहित पाकिस्तान पुगेका नेपाली चर्चित पर्वतारोही निर्मल ‘निम्स’ पुर्जाको अभियान गम्भीर संकटमा परेको छ। पाकिस्तानको काराकोरम हिमशृंखलास्थित ८ हजार ४७ मिटर अग्लो ब्रड पिकमा गएको भीषण हिमपहिरोपछि पुर्जाको नेतृत्वमा रहेको १० सदस्यीय अन्तर्राष्ट्रिय आरोही टोली सम्पर्कविहीन भएको छ।

पाकिस्तानका पर्वतारोहण अधिकारीहरूका अनुसार बिहीबार बिहान करिब ९ः२० बजे क्याम्प–२ र क्याम्प–३ बीचको क्षेत्रमा हिमपहिरो गएको थियो। त्यही समयमा शिखरतर्फ अघि बढिरहेको टोलीसँग त्यसयता कुनै सम्पर्क हुन सकेको छैन। टोलीमा पाँच नेपालीसहित पाकिस्तान, अमेरिका, चीन, ओमान तथा अर्का एक विदेशी आरोही रहेका छन्।

घटनापछि अल्पाइन क्लब अफ पाकिस्तान (एसीपी) ले पाकिस्तान सरकार तथा सम्बन्धित निकायसँग समन्वय गरेर उद्धार अभियानको तयारी थालेको जनाएको छ। मौसम अनुकूल भए शुक्रबार हेलिकोप्टरमार्फत उद्धार टोली परिचालन गर्ने तयारी गरिएको छ। यद्यपि खराब मौसम र उच्च हिमाली क्षेत्रका कारण उद्धार कार्य चुनौतीपूर्ण बन्न सक्ने अधिकारीहरूको भनाइ छ।

घटनालाई थप गम्भीर बनाउने पक्ष भनेको हिमपहिरो गएको करिब १३ घण्टापछि मात्र यसको जानकारी सार्वजनिक हुनु हो। एसीपीकी अधिकारी नाइला कियानीका अनुसार घटनाबारे राति मात्र जानकारी प्राप्त भएकाले तत्काल हेलिकोप्टर परिचालन गर्न नसकिएको हो। यदि समयमै सूचना आएको भए दिनमै उद्धार प्रयास सुरु गर्न सकिने अवस्था रहेको उनको भनाइ छ।

उपलब्ध ट्र्याकिङ उपकरणको प्रारम्भिक विवरणले पनि चिन्ताजनक संकेत देखाएको छ। आरोहीहरूको ट्र्याक बिहान करिब ९ः३० बजेदेखि अचानक रोकिएको र त्यसपछि लोकेसन सयौँ मिटर तल सरेको देखिएको बताइएको छ। यद्यपि यसको आधिकारिक पुष्टि भने अझै हुन बाँकी छ।

निर्मल पुर्जा प्रारम्भिक रूपमा ग्यासेरब्रुम–२ आरोहणका लागि पाकिस्तान पुगेका थिए। पछि उनले ब्रड पिक पनि आरोहण गर्ने निर्णय गरेका थिए। यो आरोहण सफल भएको भए अक्सिजनबिना विश्वका १४ वटै आठ हजार मिटरभन्दा अग्ला हिमाल दुईपटक आरोहण गर्ने इतिहासकै पहिलो व्यक्ति बन्ने उनको लक्ष्य एक कदम नजिक पुग्ने थियो। ब्रड पिकपछि उनको सूचीमा चो–ओयु मात्र बाँकी रहने अवस्था थियो।

सन् २००३ मा बेलायती सेनामा भर्ती भएका पुर्जा सन् २००९ मा रोयल मरिन बनेका थिए। सन् २०१२ मा पहिलोपटक सगरमाथा आरोहण गरेका उनले त्यसयता विश्व पर्वतारोहणमा नेपाललाई नयाँ उचाइमा पुर्‍याउने अनेक कीर्तिमान कायम गरेका छन्।

हाल सम्पर्कविहीन सबै आरोहीको अवस्थाबारे आधिकारिक जानकारी आउन बाँकी छ। विश्व पर्वतारोहण समुदायको ध्यान अहिले ब्रड पिकमा केन्द्रित छ भने सबैको सुरक्षित उद्धारको कामना भइरहेको छ।