पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
काठमाडौं। नेपाल चिकित्सक संघले वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको आक्रमण र अस्पतालमा गरिएको तोडफोडका दोषीलाई कानुनबमोजिम कारबाही गर्न सरकार उदासीन रहेको आरोप लगाउँदै आज पनि देशभरका अस्पतालमा आकस्मिक सेवाबाहेकका सम्पूर्ण स्वास्थ्य सेवा बन्द गर्ने जनाएको छ।
यसअघि संघले मंगलबार पनि देशभरका सरकारी तथा निजी अस्पतालमा आकस्मिकबाहेकका सबै स्वास्थ्य सेवा स्थगित गरेको थियो।
संघका अनुसार घटना भएको चार दिन बितिसक्दा पनि दोषीविरुद्ध मुद्दा दर्ता गरी कानुनी कारबाही अघि नबढाइएको, पीडित चिकित्सक तथा स्वास्थ्यकर्मीमाथि नै अन्याय भएको तथा वार्ताका लागि पुगेका चिकित्सकमाथि पर्साका प्रमुख जिल्ला अधिकारी र जिल्ला प्रहरी प्रमुखबाट दुर्व्यवहार भएको आरोप लगाइएको छ। संघले उक्त घटनालाई अत्यन्त दुःखद र लज्जास्पद भएको जनाएको छ।
घोषित आन्दोलन कार्यक्रमअनुसार आज बिहान १० बजे काठमाडौं उपत्यकाभित्र कार्यरत चिकित्सक तथा स्वास्थ्यकर्मीहरू माइतीघर मण्डलामा भेला भई विरोध प्रदर्शन गर्नेछन्। उपत्यकाबाहिरका चिकित्सक तथा स्वास्थ्यकर्मीहरूले सम्बन्धित जिल्ला प्रशासन कार्यालयमा ज्ञापनपत्र बुझाउने, साथै आफू कार्यरत स्वास्थ्य संस्थामा धर्ना दिई विरोध जनाउने कार्यक्रम रहेको संघले जनाएको छ।
नेपाल चिकित्सक संघले आफ्नो आन्दोलनमा विशेषज्ञ समाज, निजी स्वास्थ्य संस्थाका संगठन, स्वास्थ्य क्षेत्रमा क्रियाशील विभिन्न संघ–संस्था तथा सम्पूर्ण चिकित्सक र स्वास्थ्यकर्मीलाई ऐक्यबद्धता जनाउन आह्वान गरेको छ।
आन्दोलनका कारण आम नागरिकलाई पर्न गएको असुविधाप्रति क्षमायाचना गर्दै संघले त्यसको सम्पूर्ण जिम्मेवारी सरकारकै भएको स्पष्ट पारेको छ।
