पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
जनकपुरधाम । मिटरब्याजसम्बन्धी समस्या समाधानको माग गर्दै लामो समयदेखि आन्दोलनरत पीडितहरूको आक्रोश बुधबार धनुषामा चरम रूपमा देखिएको छ । धनुषा जिल्ला अदालतअगाडि विरोध प्रदर्शनका क्रममा एक पीडित महिलाले शरीरमा पेट्रोल छर्किएर आत्मदाहको प्रयास गरेपछि मिटरब्याज समस्याले गम्भीर रूप लिएको देखिएको हो ।
जनकपुरधाम–४ की फुल कुमारी रजकले अदालतअगाडि प्रदर्शनका क्रममा आफ्नै शरीरमा पेट्रोल खन्याएपछि प्रहरीले तत्काल उनलाई रोकेको थियो । प्रहरीले समयमै नियन्त्रणमा लिएपछि सम्भावित दुर्घटना हुनबाट जोगिएको हो ।
मिटरब्याज पीडितहरू अदालतअगाडि नाराबाजी गर्दै प्रदर्शन गरिरहेका बेला रजकले आत्मदाहको प्रयास गरेकी हुन् । घटनाले लामो समयदेखि न्यायको माग गर्दै सडकमा रहेका पीडितहरूको असन्तुष्टि र निराशा कति गहिरो बन्दै गएको छ भन्ने देखाएको छ ।
यता, अदालतभित्र भने मिटरब्याज साहु भनिएका गोपाल साह, रेखा साह र हरेराम साहविरुद्ध थुनछेक बहस भइरहेको छ । उनीहरूविरुद्धको मुद्दामा न्यायिक प्रक्रिया अघि बढिरहेका बेला अदालतबाहिर पीडितहरूले भने तत्काल न्याय र समस्याको स्थायी समाधानको माग गर्दै प्रदर्शन गरिरहेका छन् ।
मिटरब्याजका कारण आफूहरू ऋणको चक्रमा फसेको, अस्वाभाविक ब्याज असुलीका कारण सम्पत्ति गुमाउने अवस्था आएको तथा वर्षौंदेखि न्यायका लागि संघर्ष गर्नुपरेको पीडितहरूको गुनासो छ । विभिन्न चरणमा आन्दोलन र सरकारी पहल भए पनि समस्या पूर्ण रूपमा समाधान हुन नसक्दा पीडितहरूको असन्तुष्टि कायमै छ ।
धनुषा अदालतअगाडिको आत्मदाह प्रयासले मिटरब्याज समस्या केवल आर्थिक कारोबारसँग जोडिएको विषय नभई पीडितहरूको जीवन र सुरक्षासँग समेत जोडिएको संवेदनशील समस्या बन्दै गएको संकेत गरेको छ ।
पीडितहरूले कानुनी प्रक्रिया निष्पक्ष रूपमा अघि बढाउनुपर्ने, दोषीमाथि कारबाही हुनुपर्ने तथा मिटरब्याजबाट सिर्जित समस्याको दीर्घकालीन समाधान खोजिनुपर्ने माग गर्दै आएका छन् ।
बुधबारको घटनाले मिटरब्याजविरुद्धको आन्दोलनलाई थप संवेदनशील बनाएको छ । पीडितको आक्रोश चरम अवस्थामा पुग्नुअघि राज्यले उनीहरूका गुनासा सुन्ने र समाधानका लागि प्रभावकारी कदम चाल्नुपर्ने आवश्यकता घटनाले पुनः उजागर गरेको छ ।
