धादिङ । गोसाइँकुण्ड दर्शनका लागि धादिङबाट निस्किएका २७ जना तीर्थयात्री र बस चालक भीषण बाढीपछि सम्पर्कविहीन भएपछि नीलकण्ठ नगरपालिका–९ र १२ का परिवारको दैनिकी नै पर्खाइमा बदलिएको छ।

बा ५ ख १२५० नम्बरको बसमा सवार तीर्थयात्री र चालक छविलाल श्रेष्ठ बुधबार बिहान बेत्रावती पुगेपछि सम्पर्कविहीन भएका हुन्। बसमा चालकसहित २६ जना सवार रहेको विवरण विभिन्न स्रोतले दिएका छन्।

सम्पर्क टुट्नुअघि यात्रामा रहेका प्रकाश लम्सालले आफन्तलाई फोन गरी आफूहरू बाढीका कारण समस्यामा परेको र घरको छतमा रहेको जानकारी दिएका थिए। त्यसपछि भने उनीहरूसँग सम्पर्क हुन सकेको छैन।

बन्द घर, खुला प्रतीक्षा

तीर्थयात्रामा गएका धेरैजसो एउटै क्षेत्रका र केही परिवारका श्रीमान्–श्रीमती छन्। कतिपय घरबाट एकै परिवारका सबै सदस्य यात्रामा निस्किएका छन्। त्यसैले उनीहरू सम्पर्कविहीन भएपछि घरमा खबर पर्खने आफन्तसमेत छैनन्।

सालबोटे र गैरी टोलमा अहिले चहलपहल छैन। आफन्तहरू मोबाइल हातमा लिएर कुनै खबर आउने प्रतीक्षामा छन्। अपरिचित नम्बरबाट फोन आउँदा केही क्षण आशा जाग्छ, तर फेरि सम्पर्क हुन नसकेको अवस्थाले चिन्ता थपिन्छ।

परिवारजनको पीडा उनीहरूले अन्तिमपटक दिएको सूचनाले झनै बढाएको छ। ‘हामी छतमा छौं’ भन्ने खबरले उनीहरू तत्काल सुरक्षित हुनसक्ने आशा जगाएको थियो। तर, त्यसपछि सम्पर्क पूर्ण रूपमा टुटेपछि त्यही आशा अहिले अनिश्चित प्रतीक्षामा बदलिएको छ।

खोजीका लागि गुहार

बाढीका कारण सडक तथा सञ्चार सम्पर्कमा अवरोध भएकाले आफन्तहरू आफैं घटनास्थलसम्म पुग्न सक्ने अवस्थामा छैनन्। उनीहरूले उपलब्ध सबै स्रोत र पहुँच प्रयोग गरेर खोजी तथा उद्धारका लागि पहल गरिरहेका छन्।

स्थानीयका अनुसार अहिलेसम्म तीर्थयात्री र बसको अवस्थाबारे भरपर्दो सूचना प्राप्त भएको छैन। प्रशासन तथा सुरक्षा निकायबाट समेत खोजी तथा उद्धारका लागि पहल भइरहेको बताइएको छ।

गोसाइँकुण्डको दर्शन गर्ने श्रद्धा बोकेर घरबाट निस्किएका आफन्तको अवस्थाबारे खबर नआएपछि सालबोटे र गैरी टोलका परिवारमा एउटै प्रश्न छ—उनीहरू कहाँ छन् र कस्तो अवस्थामा छन्?

उत्तर नपाएको यही प्रश्नसँगै परिवारजनको प्रतीक्षा लम्बिँदै गएको छ। बाढीले बाटो र सञ्चार सम्पर्क टुटाए पनि आफन्तहरूले उनीहरू सकुशल भेटिने आशा भने छाडेका छैनन्।