पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
काठमाडौँ । दक्षिण जापानमा मंगलबार ७.१ म्याग्निच्युडको शक्तिशाली भूकम्प गएपछि व्यापक त्रास फैलिएको छ। स्थानीय सञ्चारमाध्यमका अनुसार भूकम्पका कारण कुमामोटोस्थित एक किनमेल केन्द्रमा मानिसहरू फसेका छन् भने घटनामा कैयौँ व्यक्ति घाइते भएका छन्।
स्थानीय समयअनुसार साँझ ४:२७ बजे जापानको क्युशु द्वीपको भित्री क्षेत्रमा भूकम्प गएको हो। भूकम्पपछि कुमामोटोस्थित एयोन किनमेल केन्द्रमा विस्फोट भएको खबर सार्वजनिक भए पनि यसको कारण र क्षतिको आधिकारिक पुष्टि हुन बाँकी रहेको अधिकारीहरूले बताएका छन्।
भूकम्प लगत्तै जापानी अधिकारीहरूले सुनामीको चेतावनी जारी गरेका थिए। तर, जोखिमको पुनः मूल्याङ्कनपछि करिब एक घण्टापछि उक्त चेतावनी फिर्ता लिइएको छ।
सुरक्षालाई मध्यनजर गर्दै प्रशासनले एक लाख ५० हजारभन्दा बढी नागरिकलाई सुरक्षित स्थान तथा राहत शिविरमा जान आग्रह गरेको छ। प्रभावित क्षेत्रमा खोज तथा उद्धार कार्य तीव्र बनाइएको छ भने उद्धार तथा राहत टोली परिचालन गरिएको छ।
जापान विश्वका सबैभन्दा बढी भूकम्प प्रभावित मुलुकमध्ये एक हो। त्यहाँ प्रत्येक वर्ष औसतमा करिब १,५०० वटा भूकम्प अभिलेख हुने गरेका छन्।
