पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
खोटाङ । नेपाली कांग्रेसको महाधिवेशन प्रक्रिया अघि बढिरहेका बेला खोटाङका ज्येष्ठ नेता एवं महासमिति सदस्य पदम निरौलाले आफू अधिवेशन प्रक्रियाबाट अलग रहने घोषणा गरेका छन्। निरौलाले पार्टी सभापति शेरबहादुर देउवा सहभागी नभएको महाधिवेशनमा आफू पनि सहभागी नहुने बताएका छन्।
निरौलाको असहमति महाधिवेशनको दिन मात्रै देखिएको होइन। आफूलाई जानकारी नदिई क्षेत्रीय प्रतिनिधि बनाइएको भन्दै उनले वडा र पालिका तहका अधिवेशनमा समेत सहभागिता नजनाएको बताएका छन्। आगामी १० गते हुने क्षेत्रीय अधिवेशनमा पनि आफू र उनकी पत्नी सहभागी नहुने उनको भनाइ छ।
आफ्नो असन्तुष्टि व्यक्त गर्दै निरौलाले ‘देउवा–कोइरालाबिनाको कांग्रेस रङबिनाको चियाजस्तै’ हुने टिप्पणी गरेका छन्। लामो समय कांग्रेसको राजनीति र शिक्षण पेशामा बिताएका निरौलाको यो अभिव्यक्तिले नयाँ नेतृत्वको अधिवेशनप्रति पुरानो पुस्ताका केही नेताहरूले उठाइरहेको प्रश्नलाई स्थानीय तहबाट बाहिर ल्याएको छ।
निरौलाले आफूलाई नसोधी प्रतिनिधि बनाइएको विषयलाई समेत असन्तुष्टिको मुख्य कारणका रूपमा उल्लेख गरेका छन्। उनका अनुसार प्रतिनिधि बनाइए पनि आफूले वडा तथा पालिका अधिवेशनमा सहभागिता नजनाएको र अब क्षेत्रीय अधिवेशनमा समेत सहभागी नहुने निर्णय गरिसकेका छन्।
माओवादी द्वन्द्वका क्रममा प्रभावित कांग्रेस नेताका रूपमा समेत परिचित निरौला खोटाङमा लामो समयदेखि कांग्रेस राजनीतिमा सक्रिय छन्। शिक्षण पेशाबाट समेत जिल्लाको सामाजिक तथा राजनीतिक क्षेत्रमा योगदान गरेका उनलाई जिल्लाका पुराना कांग्रेस नेताका रूपमा लिइन्छ।
यसपटकको अधिवेशनमा निरौलाको अनुपस्थितिले एउटा स्थानीय नेताको व्यक्तिगत असहमतिको विषय मात्रै उठाएको छैन, कांग्रेसको पुरानो पुस्ता र नयाँ नेतृत्वबीच राजनीतिक सम्बन्ध तथा प्रतिनिधित्वको प्रश्न कसरी व्यवस्थापन हुँदैछ भन्ने बहसलाई पनि खोटाङबाट सतहमा ल्याएको छ।
