पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
खोटाङ । नेपाली कांग्रेसको १५औँ महाधिवेशनअन्तर्गत देशभर वडा अधिवेशन सम्पन्न भइरहेका बेला खोटाङमा भने अधिवेशन प्रक्रियालाई लिएर गम्भीर विवाद देखिएको छ। सभापति गगन थापा समूहले अघि बढाएको वडा अधिवेशनप्रति असन्तुष्टि जनाउँदै जिल्लाका ३० भन्दा बढी वडा सभापति अधिवेशन प्रक्रियाबाट बाहिरिएको दाबी गरिएको छ।
खोटाङ कांग्रेसका नेता पेशल कुमार राईका अनुसार जिल्लाका नुनथला, मौवाबोटे, निर्मलीडाँडा, डुबेकेललगायत दर्जनौँ वडामा वडा अधिवेशन हुन सकेको छैन। कतिपय वडामा अधिवेशनको प्रक्रिया अघि बढाइए पनि निर्वाचित वडा सभापति तथा स्थानीय नेतृत्वको उपस्थिति नरहेको उनको दाबी छ।
स्थानीय पार्टी नेतृत्वसँग आवश्यक समन्वय नगरी अधिवेशन अघि बढाउन खोजिएको भन्दै वडा सभापति र स्थानीय कार्यकर्तामा असन्तुष्टि देखिएको राईले बताए। उनका अनुसार लामो समयदेखि संगठनमा सक्रिय रहेका स्थानीय नेतृत्वलाई प्रक्रियाबाट अलग राखेर अधिवेशन अघि बढाउन खोजिएपछि विवाद उत्पन्न भएको हो।
खोटाङको विवाद केवल वडा अधिवेशन सम्पन्न गर्ने वा नगर्ने विषयमा मात्र सीमित देखिँदैन। कांग्रेसको केन्द्रीय नेतृत्वमा देखिएको गगन थापा र शेरबहादुर देउवा पक्षबीचको राजनीतिक टकरावको प्रभाव जिल्लाको वडा तहसम्म पुगेको स्थानीय नेताहरू बताउँछन्।
गगन थापा समूहले अघि बढाएको अधिवेशनमा कतिपय वडामा एउटै समूहका व्यक्तिहरू वडा समिति र क्षेत्रीय प्रतिनिधिका रूपमा दोहोरिएको, नियमित रूपमा गाउँमा नरहेका तथा पार्टी गतिविधिमा सक्रिय नरहेका व्यक्तिहरूलाई समेत प्रतिनिधि बनाइएको भन्दै स्थानीय कार्यकर्ताले प्रश्न उठाएका छन्।
यसले महाधिवेशनलाई लिएर तल्लो तहका कांग्रेस कार्यकर्तामा उत्साहभन्दा निराशा बढेको संकेत गरेको छ। पार्टी विभाजनको अवस्थामा पुग्ने हो कि भन्ने चिन्ता एकातिर देखिएको छ भने अर्कोतर्फ वर्षौँदेखि संगठनमा सक्रिय रहेका कार्यकर्ताको राजनीतिक भूमिकामाथि नै प्रश्न उठ्न थालेको गुनासो स्थानीय तहमा सुनिन थालेको छ।
देशभर भने कांग्रेसको वडा अधिवेशन प्रक्रिया अघि बढिरहेको छ। केन्द्रीय निर्वाचन समितिका अनुसार ७३ जिल्लाका करिब ६ हजार वडामा वडा कार्यसमिति तथा क्षेत्रीय प्रतिनिधि चयन भइसकेका छन्। निर्वाचन समितिका सदस्य–सचिव राजु कटुवालले अधिवेशन उत्साहपूर्ण रूपमा सम्पन्न भइरहेको बताएका छन्।
तर खोटाङको अवस्थाले केन्द्रीय दाबीभन्दा फरक तस्वीर देखाएको छ। यहाँ धेरै वडा सभापति नै अधिवेशन प्रक्रियाबाट बाहिरिनु र केही वडामा अधिवेशन हुन नसक्नुले कांग्रेसको तल्लो तहमा रहेको असन्तुष्टिलाई सतहमा ल्याएको छ।
यसैबीच, भोटेकोशी बाढीबाट प्रभावित रसुवा, नुवाकोट र धादिङमा पनि वडा अधिवेशन हुन सकेको छैन। सप्तरी, सिरहा, मोरङ, रौतहट, सर्लाही र परासीका केही क्षेत्रमा समेत अधिवेशन प्रक्रिया पूरा हुन बाँकी छ। निर्वाचन समितिले बाँकी वडा अधिवेशन असोज ५ गते सञ्चालन गर्ने जनाएको छ।
कांग्रेसको १५औँ महाधिवेशन असोज १६ देखि १९ गतेसम्म हुँदैछ। महाधिवेशनको समय नजिकिँदै गर्दा खोटाङमा वडा तहबाटै देखिएको विवादले जिल्लाको कांग्रेस संगठनभित्रको ध्रुवीकरण र नेतृत्वबीचको संघर्षलाई थप सतहमा ल्याएको छ।
