काठमाडौं,  नेपाली कांग्रेसको संस्थापनइतर समूहले १५औँ महाधिवेशनमार्फत पार्टीको संगठनमा नयाँ पुस्ताको प्रतिनिधित्व सुनिश्चित गर्ने तयारी गरेको छ। समूहले तयार पारिरहेको निर्वाचन निर्देशिकामा १८ देखि २८ वर्ष उमेर समूहका युवालाई वडा तहदेखि केन्द्रसम्मका कार्यसमितिमा अनिवार्य समेट्ने व्यवस्था प्रस्ताव गरिएको छ।

इतर समूहका लागि एकराज पोख्रेलको संयोजकत्वमा गठित केन्द्रीय निर्वाचन समितिले तयार गरिरहेको निर्वाचन निर्देशिकामा सबै तहका निर्वाचित कार्यसमितिमा एक जना महिला र एक जना पुरुष १८ देखि २८ वर्ष उमेर समूहका नवयुवा समावेश गर्नुपर्ने प्रावधान राखिएको छ।

यस व्यवस्थाले महाधिवेशनको निर्वाचन प्रक्रियामार्फत नयाँ पुस्तालाई पार्टीको संगठनात्मक संरचनामा प्रवेश गराउने लक्ष्य लिएको देखिन्छ। निर्देशिका निर्माणमा संलग्न स्रोतका अनुसार समावेशी क्लस्टरबाट निर्वाचित हुने प्रतिनिधिमा समेत १८ देखि २८ वर्ष उमेर समूहका महिला र पुरुषलाई समेट्ने व्यवस्था प्रस्ताव गरिएको छ।

जेनजी नभए अन्य समूहबाट पदपूर्ति गर्न सकिने

निर्देशिकामा तोकिएको उमेर समूहका नवयुवा उपलब्ध नभएको अवस्थामा भने पद रिक्त नराखी अन्य उमेर समूह वा अन्य समावेशी समूहबाट पदपूर्ति गर्न सकिने व्यवस्था पनि राखिएको छ।

यसैगरी, सम्बन्धित तहमा विषयविज्ञको प्रतिनिधित्व आवश्यक हुने अवस्थामा विषयविज्ञको सहभागितालाई समेत अनिवार्य बनाउने प्रावधान प्रस्ताव गरिएको स्रोतले जनाएको छ। निर्वाचन निर्देशिकालाई अन्तिम रूप दिने तयारी भइरहेको छ।

वडा अधिवेशनबाट प्रक्रिया सुरु गर्ने तयारी

इतर समूहले सार्वजनिक गरेको छुट्टै कार्यतालिकाअनुसार असोज १५ गतेदेखि वडा अधिवेशन सुरु गर्ने तयारी गरेको छ। त्यसपछि असोज २० गते पालिका तथा असोज २३ गते प्रदेशसभा र प्रतिनिधिसभा निर्वाचन क्षेत्रीय अधिवेशन गर्ने कार्यतालिका अघि सारिएको छ। कात्तिक १५ गते जिल्ला र मंसिर ४ गते प्रदेश अधिवेशन गर्ने तथा मंसिर २१ देखि २३ गतेसम्म काठमाडौंमा केन्द्रीय महाधिवेशन गर्ने समूहको तयारी छ।

महाधिवेशन तयारीका लागि इतर समूहले पूर्वमहामन्त्री डा. शशांक कोइरालाको संयोजकत्वमा तयारी समिति बनाएको छ। विभिन्न जिल्लामा प्रतिनिधि तथा संयोजक तोकेर तल्लो तहका अधिवेशनको तयारी अघि बढाइएको छ।

यसबीच नेपाली कांग्रेसको १५औँ महाधिवेशनलाई लिएर दुई छुट्टाछुट्टै प्रक्रिया अघि बढिरहेका छन्। कांग्रेसको आधिकारिक केन्द्रीय निर्वाचन समितिले भने असोज १६ देखि १९ गतेसम्म काठमाडौंमा केन्द्रीय महाधिवेशन गर्ने कार्यतालिका सार्वजनिक गरेको छ। त्यस कार्यतालिकाअनुसार विभिन्न तहका अधिवेशन पनि अघि बढाइएको जनाएको छ।

यसरी इतर समूहको तयारीमा महाधिवेशनको मिति र संगठन विस्तारसँगै नयाँ पुस्ताको प्रतिनिधित्वलाई निर्वाचन प्रक्रियाकै हिस्सा बनाउने विषय प्रमुख रूपमा अघि आएको छ।